Qur’an 72 · 28 ayahs

Surah Al-Jinn

سورة الجن

Audio is not listed for this edition. Browse audio translations.

72:1
All translationsLinkSource ↗

قُلۡ أُوحِيَ إِلَيَّ أَنَّهُ ٱسۡتَمَعَ نَفَرٞ مِّنَ ٱلۡجِنِّ فَقَالُوٓاْ إِنَّا سَمِعۡنَا قُرۡءَانًا عَجَبٗا

Edtalu ka (Muhammad) sa kanilan: aden nakikineg kanu kapembatya kanu jin a pidtalu nilan kanu manga tagapeda nilan i nakineg nami i Qur’an a makagayp.

72:2
All translationsLinkSource ↗

يَهۡدِيٓ إِلَى ٱلرُّشۡدِ فَـَٔامَنَّا بِهِۦۖ وَلَن نُّشۡرِكَ بِرَبِّنَآ أَحَدٗا

Ka pedtutulu kanu makagkapya na pinangimbenal nami endu di kami den a bnal sumakutu sa Kadenan apya maka-isa.

72:3
All translationsLinkSource ↗

وَأَنَّهُۥ تَعَٰلَىٰ جَدُّ رَبِّنَا مَا ٱتَّخَذَ صَٰحِبَةٗ وَلَا وَلَدٗا

Endu mahasuti a masla su Kadenan tanu da pamaluy sa kaluma endu wata nin.

72:4
All translationsLinkSource ↗

وَأَنَّهُۥ كَانَ يَقُولُ سَفِيهُنَا عَلَى ٱللَّهِ شَطَطٗا

Endu ya pidtalu nu (Iblis/Shaytan) kanu Allah na subra a kalbutan.

72:5
All translationsLinkSource ↗

وَأَنَّا ظَنَنَّآ أَن لَّن تَقُولَ ٱلۡإِنسُ وَٱلۡجِنُّ عَلَى ٱللَّهِ كَذِبٗا

Endu saben-sabenal a sekami na ga-antap nami i di madtalu na manusya endu jin i kalbutan sa Allah.

72:6
All translationsLinkSource ↗

وَأَنَّهُۥ كَانَ رِجَالٞ مِّنَ ٱلۡإِنسِ يَعُوذُونَ بِرِجَالٖ مِّنَ ٱلۡجِنِّ فَزَادُوهُمۡ رَهَقٗا

Endu aden mama na manusya a ya nilan lindungan sa ginawa nilan na mama a jin, na kawmanan bun silan na kadarwakan.

72:7
All translationsLinkSource ↗

وَأَنَّهُمۡ ظَنُّواْ كَمَا ظَنَنتُمۡ أَن لَّن يَبۡعَثَ ٱللَّهُ أَحَدٗا

Endu silan na antapan nilan na magidsan bun kanu antapan nu sa di den mapambwat su Allah sa apya maka-isa bu (sugun a manusya atawaka jin).

72:8
All translationsLinkSource ↗

وَأَنَّا لَمَسۡنَا ٱلسَّمَآءَ فَوَجَدۡنَٰهَا مُلِئَتۡ حَرَسٗا شَدِيدٗا وَشُهُبٗا

(Pidtalu nu manga jin): saben-sabenal a kinembil nami su langit na nawma nami i napenu na pembantay a mapasang endu bitun a pegkaleg.

72:9
All translationsLinkSource ↗

وَأَنَّا كُنَّا نَقۡعُدُ مِنۡهَا مَقَٰعِدَ لِلسَّمۡعِۖ فَمَن يَسۡتَمِعِ ٱلۡأٓنَ يَجِدۡ لَهُۥ شِهَابٗا رَّصَدٗا

Endu sekami paganay na bamagagayan kami sa bakikineg lu sa pulu, entayn i makakineg saguna na nya nin mawma na apuy a pinagadil.

72:10
All translationsLinkSource ↗

وَأَنَّا لَا نَدۡرِيٓ أَشَرٌّ أُرِيدَ بِمَن فِي ٱلۡأَرۡضِ أَمۡ أَرَادَ بِهِمۡ رَبُّهُمۡ رَشَدٗا

Endu saben-sabenal a di nami katawan upama mawag i kaghanda sa taw sya sa lupa, atawaka ya kahanda nu Allah sa kanilan na mapya.

72:11
All translationsLinkSource ↗

وَأَنَّا مِنَّا ٱلصَّٰلِحُونَ وَمِنَّا دُونَ ذَٰلِكَۖ كُنَّا طَرَآئِقَ قِدَدٗا

Endu saben-sabenal a aden sa lekitanu i manga mapya na aden bun di kena mapya sa lekitanu na embida-bida tanu (supak/matidtu).

72:12
All translationsLinkSource ↗

وَأَنَّا ظَنَنَّآ أَن لَّن نُّعۡجِزَ ٱللَّهَ فِي ٱلۡأَرۡضِ وَلَن نُّعۡجِزَهُۥ هَرَبٗا

Endu natagu sa ginawa nami i di tanu malepas kanu kahanda nu Allah sya kanu dalpa endu di tanu kapalaguyan.

72:13
All translationsLinkSource ↗

وَأَنَّا لَمَّا سَمِعۡنَا ٱلۡهُدَىٰٓ ءَامَنَّا بِهِۦۖ فَمَن يُؤۡمِنۢ بِرَبِّهِۦ فَلَا يَخَافُ بَخۡسٗا وَلَا رَهَقٗا

Endu saben-sabenal a guna nami makineg su tutulu na pinangimbenal nami, sa entayn i mangimbenal kanu Kadenan nin na di magilek sa kakulangan su mapya nin atawaka kawmanan su kawag nin.

72:14
All translationsLinkSource ↗

وَأَنَّا مِنَّا ٱلۡمُسۡلِمُونَ وَمِنَّا ٱلۡقَٰسِطُونَۖ فَمَنۡ أَسۡلَمَ فَأُوْلَٰٓئِكَ تَحَرَّوۡاْ رَشَدٗا

Endu saben-sabenal a aden sa lekitanu i Muslim endu aden bun i pendarwaka, entayn i sumangkup na silan i migkahanda sa kambantangan.

72:15
All translationsLinkSource ↗

وَأَمَّا ٱلۡقَٰسِطُونَ فَكَانُواْ لِجَهَنَّمَ حَطَبٗا

Endu su manga dupang na silan i belalag kanu naraka.

72:16
All translationsLinkSource ↗

وَأَلَّوِ ٱسۡتَقَٰمُواْ عَلَى ٱلطَّرِيقَةِ لَأَسۡقَيۡنَٰهُم مَّآءً غَدَقٗا

Umana bu ka midtinidtwan silan kanu lalan (Islam) na bubwan nami silan sa rizki a maleges-

72:17
All translationsLinkSource ↗

لِّنَفۡتِنَهُمۡ فِيهِۚ وَمَن يُعۡرِضۡ عَن ذِكۡرِ رَبِّهِۦ يَسۡلُكۡهُ عَذَابٗا صَعَدٗا

Ka batalun nami silan kanu rizki, na su taw a di nin tademan su Kadenan nin na paludepen nami kanu siksa a mapasang.

72:18
All translationsLinkSource ↗

وَأَنَّ ٱلۡمَسَٰجِدَ لِلَّهِ فَلَا تَدۡعُواْ مَعَ ٱللَّهِ أَحَدٗا

Endu saben-sabenal su masgit na kanu Allah na da kanu sumakutu sa Allah sa apya maka-isa.

72:19
All translationsLinkSource ↗

وَأَنَّهُۥ لَمَّا قَامَ عَبۡدُ ٱللَّهِ يَدۡعُوهُ كَادُواْ يَكُونُونَ عَلَيۡهِ لِبَدٗا

Endu saben-sabenal a guna pedtindeg su ulipen nu Allah (Muhammad) sa kapedsambayang nin na (silan a manga jin) na pamakadtatambaka sa kabpakikineg (kanu batyan nu rasul).

72:20
All translationsLinkSource ↗

قُلۡ إِنَّمَآ أَدۡعُواْ رَبِّي وَلَآ أُشۡرِكُ بِهِۦٓ أَحَدٗا

Edtalu ka (Muhammad): ya ku bu simban su Kadenan ku, endu di ku sakutun sekanin sa apya maka-isa bu.

72:21
All translationsLinkSource ↗

قُلۡ إِنِّي لَآ أَمۡلِكُ لَكُمۡ ضَرّٗا وَلَا رَشَدٗا

Edtalu ka i saben-sabenal na saki na di ku kagkaydan sekanu endu di ku makapagkapya sekanu.

72:22
All translationsLinkSource ↗

قُلۡ إِنِّي لَن يُجِيرَنِي مِنَ ٱللَّهِ أَحَدٞ وَلَنۡ أَجِدَ مِن دُونِهِۦ مُلۡتَحَدًا

Edtalu ka i saben-sabenal a saki na da makalepas lun a salakaw sa Allah endu da salakaw sa lekanin a kalumpingan (kabpawangan) ku.

72:23
All translationsLinkSource ↗

إِلَّا بَلَٰغٗا مِّنَ ٱللَّهِ وَرِسَٰلَٰتِهِۦۚ وَمَن يَعۡصِ ٱللَّهَ وَرَسُولَهُۥ فَإِنَّ لَهُۥ نَارَ جَهَنَّمَ خَٰلِدِينَ فِيهَآ أَبَدًا

Ka saki na papedsampay ku bu (su haqq) ebpun sa Allah endu su manga hukuman nin, su taw a supaken nin su sinugu na lekanin su naraka sa di den makalyu.

72:24
All translationsLinkSource ↗

حَتَّىٰٓ إِذَا رَأَوۡاْ مَا يُوعَدُونَ فَسَيَعۡلَمُونَ مَنۡ أَضۡعَفُ نَاصِرٗا وَأَقَلُّ عَدَدٗا

Taman sa amayka mailay nilan su siksa nilan na katawan nilan den u entayn i malubay i tabang nin endu paydu i bilangan nin (i mapya nin).

72:25
All translationsLinkSource ↗

قُلۡ إِنۡ أَدۡرِيٓ أَقَرِيبٞ مَّا تُوعَدُونَ أَمۡ يَجۡعَلُ لَهُۥ رَبِّيٓ أَمَدًا

Edtalu ka (Muhammad): di ku katawan u masupeg su siksa sa lekanu amayka di kanu mangimbenal, atawaka aden bun binaluy nin a kawma nin.

72:26
All translationsLinkSource ↗

عَٰلِمُ ٱلۡغَيۡبِ فَلَا يُظۡهِرُ عَلَىٰ غَيۡبِهِۦٓ أَحَدًا

Sekanin (Allah) i mataw sa gayb, da mataw kanu gayb nin apya sakataw,

72:27
All translationsLinkSource ↗

إِلَّا مَنِ ٱرۡتَضَىٰ مِن رَّسُولٖ فَإِنَّهُۥ يَسۡلُكُ مِنۢ بَيۡنِ يَدَيۡهِ وَمِنۡ خَلۡفِهِۦ رَصَدٗا

Ya tabya na su nasuwatan nu Allah a sinugu nin a pailayn nin sa mu’jizat saleta na pembantayan nu malaikat i kasangulan-taligkudan nilan.

72:28
All translationsLinkSource ↗

لِّيَعۡلَمَ أَن قَدۡ أَبۡلَغُواْ رِسَٰلَٰتِ رَبِّهِمۡ وَأَحَاطَ بِمَا لَدَيۡهِمۡ وَأَحۡصَىٰ كُلَّ شَيۡءٍ عَدَدَۢا

Ka endu nilan katawan i saben-sabenal su pinasampay nilan kanu manga ayatan nu Kadenan nilan, endu langkap kanu hadapan nilan endu su langun nu engagga-isa.

Read this surah in another language or edition